اینکر پرسن ربیعہ احسن قتل کیس: مرکزی ملزم و شوہر احسن کا 2 گھنٹے طویل پولی گرافک ٹیسٹ مکمل

راولپنڈی میں 92 نیوز کی خاتون اینکر پرسن ربیعہ احسن کے قتل کیس کی تفتیش میں اہم پیش رفت سامنے آئی ہے، جہاں مقتولہ کے شوہر اور مرکزی ملزم احسن کا پولی گرافک ٹیسٹ مکمل کر لیا گیا ہے۔ پولیس ذرائع کے مطابق پنجاب فرانزک سائنس لیبارٹری میں ملزم کا یہ سچائی جانچنے کا ٹیسٹ 2 گھنٹے سے زائد جاری رہا، جس کے دوران ملزم سے وقوعے، الماری میں پستول کی موجودگی اور گولی چلنے کے واقعات سے متعلق مختلف سوالات کیے گئے۔ ٹیسٹ کے دوران ملزم کے جوابات پر اس کی دل کی دھڑکن، بلڈ پریشر اور دیگر جسمانی تبدیلیوں کا باریک بینی سے مشاہدہ کیا گیا۔ پولیس ذرائع کا کہنا ہے کہ پولی گرافک ٹیسٹ کی رپورٹ چند روز میں مرتب کر لی جائے گی، جس سے ملزم کے بیانات کی صداقت جانچنے اور مقدمے کی تفتیش کو حتمی سمت دینے میں مدد ملے گی۔