سندھ حکومت کا آبادگاروں کو سبسڈی دینے کا فیصلہ

سندھ حکومت نے ربیع سیزن کے لیے ‘سندھ ویٹ گروورز سپورٹ پروگرام’ کے تحت آبادگاروں کو 17 ارب روپے کی مجموعی سبسڈی 20 نومبر کو جاری کرنے کا حتمی فیصلہ کیا ہے۔ پاکستان پیپلز پارٹی کے چیئرمین بلاول بھٹو زرداری 20 نومبر کو وزیراعلیٰ ہاؤس میں منعقدہ ایک خصوصی تقریب کے دوران اس سبسڈی کا باقاعدہ افتتاح کریں گے۔ صوبائی وزیر زراعت سردار محمد بخش خان مہر کی زیرِ صدارت منعقدہ اجلاس میں بتایا گیا کہ بینظیر ہاری کارڈ کے ذریعے رواں ربیع سیزن میں صوبے کے ساڑھے 5 لاکھ سے زائد آبادگار اس مالیاتی پروگرام سے براہِ راست مستفید ہوں گے۔ سیکریٹری زراعت محمد زمان ناریجو نے اجلاس کو آبادگاروں کی رجسٹریشن کے طریقہ کار اور افتتاحی تقریب کے انتظامات پر تفصیلات پیش کیں۔