گوادر پورٹ پر اہم پیش رفت، پاناما کے پرچم بردار بحری جہاز کی کامیاب برتھنگ

گوادر پورٹ پر ٹرانسشپمنٹ سرگرمیوں میں ایک اور اہم پیش رفت سامنے آئی ہے جہاں پاناما کے پرچم بردار بحری جہاز “ایم وی گریٹ وین تاؤ” کی کامیاب برتھنگ کے بعد 26 ہزار 321 میٹرک ٹن سے زائد کارگو کی ان لوڈنگ کا عمل شروع کر دیا گیا ہے۔ یہ بحری جہاز متحدہ عرب امارات کی بندرگاہ فجیرہ کے لیے کارگو لے کر گوادر پہنچا ہے، جسے عارضی طور پر پورٹ پر محفوظ رکھنے کے بعد دوسرے بحری جہاز کے ذریعے منزل مقصود تک منتقل کیا جائے گا۔ چیئرمین گوادر پورٹ نورالحق بلوچ کے مطابق خلیجی خطے میں بحری تجارتی راستوں کو درپیش چیلنجز کے تناظر میں گوادر پورٹ کی اہمیت مزید بڑھ گئی ہے اور ٹرانسشپمنٹ کا یہ تسلسل عالمی شپنگ کمپنیوں اور تجارتی حلقوں کے بڑھتے ہوئے اعتماد کا مظہر ہے، جس سے خطے میں لاجسٹکس اور ہینڈلنگ کے شعبوں میں روزگار اور تجارت کے نئے مواقع پیدا ہوں گے۔