خیبرپختونخوا میں 10 سے 14 نومبر تک بارش اور برف باری کا الرٹ جاری

پی ڈی ایم اے (PDMA) نے خیبرپختونخوا کے بالائی اور میدانی اضلاع میں 10 سے 14 نومبر کے دوران تیز ہواؤں کے ساتھ بارشوں اور برفباری کی پیشگوئی کے پیشِ نظر الرٹ جاری کر دیا ہے۔ محکمے کے مطابق چترال، دیر، سوات، ملاکنڈ، کوہستان، مانسہرہ اور ایبٹ آباد کے علاوہ پشاور، مردان، صوابی، نوشہرہ اور کوہاٹ جیسے میدانی اضلاع میں بھی بارش کا امکان ہے۔ جبکہ بلند پہاڑی سلسلوں پر ہلکی برفباری، ژالہ باری اور لینڈ سلائیڈنگ کا خطرہ ظاہر کیا گیا ہے۔ اس موسمی سلسلے کے باعث دن کے درجہ حرارت میں 2 سے 4 ڈگری سینٹی گریڈ تک کمی کا امکان ہے اور بارشوں کے بعد میدانی علاقوں میں دھند چھا سکتی ہے۔ پی ڈی ایم اے نے تمام ضلعی انتظامیہ اور متعلقہ اداروں کو الرٹ رہنے جبکہ سیاحوں اور مسافروں کو پہاڑی علاقوں میں سفر کے دوران محتاط رہنے کی ہدایت کی ہے۔