خاور مانیکا تشدد کیس: پی ٹی آئی حامی وکلا کیخلاف فرد جرم کل عائد ہوگی

انسدادِ دہشت گردی عدالت (ATC) اسلام آباد کے جج طاہر عباس سپرا نے خاور مانیکا پر تشدد سے متعلق کیس کی سماعت کے دوران ملزم پی ٹی آئی حامی وکلاء پر کل 11 نومبر کو فردِ جرم عائد کرنے کی تاریخ مقرر کر دی ہے۔ دورانِ سماعت وکلاءِ صفائی کی جانب سے لمبی تاریخ دینے کی استدعا پر عدالت نے برہمی کا اظہار کرتے ہوئے ریمارکس دیے کہ ملزمان کی غیر حاضری کے باعث معاملے کو تماشا بنا دیا گیا ہے، لہٰذا جب تک تمام ملزمان کی حاضری مکمل نہیں ہوتی، کیس کی سماعت روزانہ کی بنیاد پر کی جائے گی۔ جج نے واضح کیا کہ کل فردِ جرم عائد ہونے کے بعد مناسب آئندہ تاریخ دے دی جائے گی۔ اس سے قبل وکلاءِ صفائی نے موقف اختیار کیا کہ جو ملزمان باقاعدگی سے عدالت میں پیش ہو رہے ہیں ان کا کیا قصور ہے۔ بعد ازاں عدالت نے مقدمے کی مزید سماعت کل تک کے لیے ملتوی کر دی۔