روسی افواج کو بھاری نقصانات امن مذاکرات میں کیف کی پوزیشن مضبوط بنا رہے: صدر زیلنسکی

یوکرین کے صدر ولادیمیر زیلنسکی نے کہا ہے کہ میدانِ جنگ میں یوکرینی فوج کی متواتر کامیابیاں اور روسی افواج کو پہنچنے والا بھاری نقصان امن مذاکرات کے لیے کیف کی پوزیشن کو مسلسل مضبوط بنا رہا ہے۔ اپنے ایک بیان میں یوکرینی صدر نے بتایا کہ فوج کی دفاعی کارروائیاں اور خصوصاً روسی تیل کی تنصیبات پر طویل فاصلے تک مار کرنے والے ڈرون و میزائل حملے انتہائی مؤثر ثابت ہو رہے ہیں، جبکہ روس کو جنگ کے خاتمے پر آمادہ کرنے کے لیے امریکہ کا کردار کلیدی نوعیت کا ہے۔ واضح رہے کہ روس اور یوکرین کے درمیان سالوں سے جاری جنگ کو ختم کروانے کے لیے امریکہ کی ثالثی میں سہ فریقی مذاکرات کا آغاز آج سے ابوظہبی میں ہو رہا ہے، جسے رواں سال کے آغاز کے بعد فریقین کے درمیان سفارتی پیشرفت کے لیے پہلی سنجیدہ کوشش قرار دیا جا رہا ہے۔