وزیراعظم کا اسرائیل کی جانب سے غزہ میں مسلسل مظالم پر اظہارِ تشویش

وزیراعظم شہباز شریف نے غزہ کے بہادر فلسطینی عوام کو بنیادی انسانی امداد سے محروم رکھنے کی اسرائیلی پالیسی اور مسلسل غیر قانونی اقدامات پر گہری تشویش کا اظہار کیا ہے۔ انہوں نے شدید بارشوں سے 70 ہزار سے زائد خیمے زیرِ آب آنے، 3 لاکھ 50 ہزار بے گھر افراد کے متاثر ہونے اور بچوں کے شدید سردی اور بھوک میں بے یار و مددگار ہونے پر شدید افسوس ظاہر کرتے ہوئے اسرائیل کی جانب سے جنگ بندی کی خلاف ورزیوں اور عالمی قوانین کی پامالی کی سخت مذمت کی۔ وزیراعظم نے وزارتِ خارجہ کو فوری ہدایت جاری کی ہے کہ فلسطینی بہن بھائیوں کے لیے انسانی امداد کی فراہمی میں اضافے کے لیے تمام ممکنہ ذرائع بروئے کار لائے جائیں۔ دوسری جانب حماس نے خیموں کی تباہی کو اسرائیلی محاصرے کی سنگینی کا نتیجہ قرار دیتے ہوئے کہا ہے کہ اسرائیل ہنگامی پناہ گاہوں، گرمائش کے آلات اور مرمتی سامان کی فراہمی میں رکاوٹ ڈال کر انسانی بحران کو مزید گہرا کر رہا ہے، جبکہ غزہ میں اس وقت فوری طور پر 3 لاکھ خیموں کی ضرورت ہے۔