امریکا ایران کیخلاف جنگ کے ذریعے عالمی معیشت میں خلل ڈال رہا ہے: علی باقری کنی

ایران کی سپریم نیشنل سیکیورٹی کونسل کے سیکرٹریٹ میں بین الاقوامی امور کے نائب سربراہ علی باقری کنی نے امریکہ پر سخت الزام عائد کرتے ہوئے کہا ہے کہ واشنگٹن ایران کے خلاف بلاجواز جنگ اور عسکری اقدامات کے ذریعے عالمی معیشت اور تجارتی نظام میں شدید خلل ڈالنے کی مذموم کوشش کر رہا ہے۔

ایرانی سرکاری خبر رساں ایجنسی ‘ارنا’ (IRNA) کے مطابق، چین کے دارالحکومت بیجنگ میں چینی وزیر خارجہ وانگ یی سے اعلیٰ سطحی ملاقات کے دوران گفتگو کرتے ہوئے علی باقری کنی نے کہا کہ امریکہ کی جانب سے کیے جانے والے حالیہ تمام اقدامات اس کی روایتی جارحانہ پالیسیوں اور سامراجی بالادستی پسند فطرت کی کھلی عکاسی کرتے ہیں۔

ان کا کہنا تھا کہ ایران کے خلاف اختیار کی گئی امریکہ کی جارحانہ پالیسی نہ صرف مشرق وسطیٰ کے امن و استحکام کے لیے شدید خطرہ ہے، بلکہ اس کے اثرات عالمی معیشت، بین الاقوامی توانائی کی منڈیوں اور عالمی تجارتی نظام پر بھی انتہائی منفی انداز میں مرتب ہو سکتے ہیں۔ اس ملاقات کے دوران دونوں رہنماؤں نے خطے کی بگڑتی ہوئی صورتحال، ایران پر امریکی حملوں اور باہمی اسٹریٹجک تعاون کے مختلف پہلوؤں پر تفصیلی تبادلہ خیال کیا۔