ڈی آئی خان: شہریوں کے تحفظ کیلئے جدید ایس او ایس ایمرجنسی سسٹم متعارف

خیبرپختونخوا میں ایمرجنسی کے نفاذ کے بعد ہنگامی حالات سے نمٹنے، فوری مدد کی فراہمی اور عوام الناس کے تحفظ کو یقینی بنانے کے لیے ضلع ڈیرہ اسماعیل خان میں جدید ترین ایس او ایس (SOS) ایمرجنسی سسٹم باضابطہ طور پر متعارف کرادیا گیا ہے۔

حکومتی ذرائع کے مطابق، ‘بدلتا، نکھرتا، مضبوط خیبرپختونخوا’ ویژن کے تحت شہر بھر کے اہم مقامات اور پولز پر خصوصی ایمرجنسی الرٹ سسٹمز نصب کیے گئے ہیں، جو شہریوں کو کسی بھی ناگہانی صورتحال میں فوری امداد فراہم کرنے کی صلاحیت رکھتے ہیں۔ کسی بھی حادثے یا ہنگامی صورتحال کے پیشِ نظر شہری صرف ایک بٹن دبا کر اس ہائی ٹیک سسٹم کو فعال کر سکتے ہیں۔ حکام کا کہنا ہے کہ بٹن دبانے کے چند ہی سیکنڈز کے اندر کنٹرول روم میں موجود متعلقہ حکام اور سیکیورٹی اداروں سے فوری طور پر لائیو وائس (آواز) اور ویڈیو رابطہ قائم ہو جاتا ہے، جس سے امدادی ٹیموں کو فوراً جائے وقوعہ پر روانہ کرنا آسان ہو جاتا ہے۔

مقامی عوام اور شہریوں نے اس جدید سہولت کا خیرمقدم کرتے ہوئے کہا کہ صوبے میں گورنر راج اور ایمرجنسی کے نفاذ کے بعد سے خیبرپختونخوا میں عوامی فلاح، بہترین انتظامی اقدامات اور جدید ٹیکنالوجی پر مبنی سہولیات کے فروغ پر خصوصی اور عملی توجہ دی جا رہی ہے، جس سے امن و امان کی صورتحال بہتر بنانے میں مدد ملے گی۔