مریم نواز کا چودھری سالک کو ہتکِ عزت کا نوٹس بھجوانے کا اعلان

وزیر اعلیٰ پنجاب مریم نواز شریف نے اعلان کیا ہے کہ وہ بے بنیاد الزامات عائد کرنے پر وفاقی وزیر برائے سمندر پار پاکستانی و ترقیِ انسانی وسائل چودھری سالک حسین کو ہتکِ عزت کا نوٹس بھجوائیں گی۔

لاہور میں ہونہار اسکالرشپ اور طلبہ میں لیپ ٹاپ تقسیم کرنے کی ایک پروقار تقریب سے خطاب کرتے ہوئے وزیر اعلیٰ پنجاب مریم نواز شریف نے دوٹوک الفاظ میں کہا کہ چوہدری سالک ایک وفاقی وزیر ہیں، اس لیے انہیں ہو ہو کر باتیں کرنے یا الزام تراشی کرنے کے بجائے ٹھوس ثبوت پیش کرنے چاہئیں؛ اگر ان کے پاس کوئی ثبوت موجود ہیں تو وہ انہیں عوام اور عدالت کے سامنے لائیں، ورنہ وہ انہیں عدالت میں گھسیٹیں گی۔ انہوں نے سابقہ دورِ حکومت پر تنقید کرتے ہوئے کہا کہ پرویز الہٰی نے گجرات شہر کو جیسی حالت میں چھوڑا تھا، وہاں ان کی اپنی لینڈ کروزر گاڑی بھی بارش کے پانی میں ڈوب گئی تھی، اور آج انہیں اصل تکلیف اس بات کی ہے کہ انہوں نے نااہل افسران کو ہٹا کر ڈی سی گجرات کو تبدیل کیا ہے۔ مریم نواز نے کہا کہ جو لوگ ان کے سیاسی طور پر گرنے یا ناکام ہونے کے منتظر تھے، آج صوبے میں ترقی کا سفر دیکھ کر منفی پروپیگنڈا کرنے پر اتر آئے ہیں۔

وزیر اعلیٰ نے شہریوں کو تلقین کرتے ہوئے کہا کہ جس طرح ہر شخص اپنے گھر کو صاف ستھرا رکھتا ہے، اسی طرح ہمیں اپنے ملک اور شہر کو بھی صاف رکھنا ہے، اور کوئی کچھ بھی کہے لیکن کسی کو بھی ملکی مفاد کے خلاف ہتھیار نہیں اٹھانے چاہئیں۔ انہوں نے مزید کہا کہ بات کرپشن کی نہیں ہے بلکہ اصولوں کی ہے، ایک وفاقی وزیر کو اس طرح کے ذمہ دارانہ عہدے پر بیٹھ کر بغیر ثبوت کے الزامات نہیں لگانے چاہئیں، کیونکہ جو شخص یا اہلکار صرف سفارش پر آگے آتا ہے وہ ملک اور عوام کا بیڑا غرق کر دیتا ہے۔