پاکستان میں ڈیجیٹل بینکنگ کے فروغ کیلئے ڈاکٹر عشرت نے انقلابی اقدامات کیے: وزیر خزانہ

وفاقی وزیر خزانہ و امورِ ماليات محمد اورنگزیب نے کہا ہے کہ پاکستان کے مالیاتی اور بینکاری نظام کو جدید بنانے اور ملک میں ڈیجیٹل بینکنگ کے فروغ کے لیے اسٹیٹ بینک آف پاکستان کے سابق گورنر ڈاکٹر عشرت حسین نے انتہائی انقلابی اقدامات کیے ہیں۔

اسلام آباد میں سسٹین ایبل ڈویلپمنٹ پالیسی انسٹی ٹیوٹ (SDPI) کے زیرِ اہتمام منعقدہ 29ویں پائیدار ترقی کانفرنس کی خصوصی تقریب کے دوران ممتاز معیشت دان اور سابق گورنر اسٹیٹ بینک ڈاکٹر عشرت حسین کو ان کی گراں قدر خدمات کے اعتراف میں ‘لائف ٹائم اچیومنٹ ایوارڈ’ سے نوازا گیا۔ تقریب سے اہم خطاب کرتے ہوئے وفاقی وزیر خزانہ محمد اورنگزیب نے ڈاکٹر عشرت حسین کی طویل قومی و ادارہ جاتی خدمات کو زبردست الفاظ میں خراجِ تحسین پیش کیا۔

وزیر خزانہ نے اپنے خطاب میں کہا کہ ڈاکٹر عشرت حسین نے پبلک سروس اور سول سروس اصلاحات کے دوران ہمیشہ معیار کی بہتری اور پائیدار اصلاحات کو سرفہرست ترجیح دی۔ انہوں نے بطور گورنر اسٹیٹ بینک بینکنگ سیکٹر کی ساخت بدلنے میں تاریخی کردار ادا کیا اور بینکنگ کی دنیا میں جدید ٹیکنالوجی کے عملی استعمال کی بنیاد رکھی۔ محمد اورنگزیب کا مزید کہنا تھا کہ ڈاکٹر عشرت حسین کے دورِ قیادت میں مرکزی بینک کو عالمی معیار کے مطابق ٹیکنالوجی سے ہم آہنگ کیا گیا جبکہ ملک میں ڈیجیٹل بینکنگ اور فنانشل انکلوژن کی مضبوط بنیاد رکھی گئی۔ اس کے علاوہ انہوں نے سرکاری اداروں کی رائٹ سائزنگ اور ڈاؤن سائزنگ کی فریم ورک پالیسی سازی میں بھی لازوال کاوشیں سرانجام دیں، جنہیں ملکی معیشت اور ادارہ جاتی بہتری کی تاریخ میں ہمیشہ سنہرے الفاظ میں یاد رکھا جائے گا۔