انتخابی اصلاحات کی کمیٹی میں اتحادیوں کی نمائندگی کا معاملہ حکومت کیلئے چیلنج بن گیا

انتخابی اصلاحات کی پارلیمانی کمیٹی میں اتحادی جماعتوں کی نمائندگی پر حکومتی اتحاد میں تحفظات سامنے آئے ہیں، جہاں ایم کیو ایم پاکستان نے کمیٹی میں صرف 1 نشست ملنے پر اعتراض اٹھاتے ہوئے اس میں اضافے کا مطالبہ کر دیا ہے۔ ایم کیو ایم کے رہنما سید امین الحق نے حکومتی چیف وہپ ڈاکٹر طارق فضل چودھری سے رابطہ کر کے موقف اختیار کیا کہ قومی اسمبلی میں 22 نشستیں رکھنے والی اہم اتحادی جماعت کے طور پر ایم کیو ایم کو کمیٹی میں 1 کے بجائے 2 ارکان کی نمائندگی دی جائے۔ انہوں نے بتایا کہ چیف وہپ نے حکومتی قیادت سے بات چیت کی یقین دہانی کرائی ہے اور امید ہے کہ اگلے دو سے تین دنوں میں اس معاملے پر مثبت فیصلہ سامنے آئے گا۔