آپریشن الفارس الشهم 3 کے تحت 343 ٹن انسانی امداد امارات سے غزہ روانہ

متحدہ عرب امارات نے مصیبت کی اس گھڑی میں فلسطینی عوام کی بھرپور مدد اور ان کی بنیادی ضروریاتِ زندگی کو پورا کرنے کے لیے 343 ٹن پر مشتمل بڑی انسانی امداد غزہ پہنچا دی ہے۔ یہ امدادی سامان 38 ٹرکوں پر مشتمل 4 مختلف کھیپوں کی صورت میں خصوصی انسانی ہمدردی کے آپریشن ’الفارس الشہم 3‘ کے تحت غزہ روانہ کیا گیا۔

اماراتی حکام کی جانب سے فراہم کردہ تفصیلات کے مطابق، اس امدادی سامان میں غزہ کے کڑے حالات میں زندگی گزارنے والے عوام کے لیے خوراک کی اشیا اور رہائش کے لیے انتہائی ضروری سامان شامل ہے۔ امدادی کارروائیوں کے باضابطہ سلسلے کے تحت مصری شہر العریش میں قائم متحدہ عرب امارات کے انسانی امداد کے لاجسٹک مرکز میں اس سامان کی وصولی، اس کی بہترین درجہ بندی اور پھر اسے غزہ روانگی کے لیے تیار کرنے کا عمل مسلسل جاری ہے۔

حکام کا کہنا ہے کہ امدادی قافلوں کی تیاری اور ان کی بروقت ترسیل ایک انتہائی مربوط اور منظم نظام کے تحت کی جا رہی ہے، تاکہ غزہ کے محاصرہ زدہ علاقوں میں ضرورت مند فلسطینی بھائیوں تک امداد کی مسلسل اور بلاتعطل فراہمی کو یقینی بنایا جا سکے۔ متحدہ عرب امارات کی جانب سے آپریشن ’الفارس الشہم 3‘ کے تحت باقاعدگی سے انسانی امداد کی کھیپیں بھیجی جا رہی ہیں، جن کا بنیادی مقصد جنگ سے متاثرہ فلسطینی عوام کی مشکلات میں کمی لانا اور انہیں اس بحران کے دوران درپیش ہنگامی انسانی ضروریات کو پورا کرنے میں عملی مدد فراہم کرنا ہے