پاکستان اور قطر کی ثالثی میں بات چیت تیز ہو گئی: ایرانی وزیر خارجہ

ایرانی وزیر خارجہ اسماعیل بقائی نے اعلان کیا ہے کہ پاکستان اور قطر کی مخلصانہ ثالثی کے نتیجے میں امریکا کے ساتھ بات چیت کے عمل میں تیزی آ گئی ہے، اور اب گیند مکمل طور پر امریکی کورٹ میں ہے۔

ایرانی وزیر خارجہ اسماعیل بقائی نے میڈیا سے گفتگو کرتے ہوئے کہا کہ کسی بھی حتمی معاہدے کا کامیابی سے ہمکنار ہونا اب مکمل طور پر امریکیوں کی سیاسی بصیرت اور سنجیدگی پر منحصر ہے، تاہم انہوں نے دوٹوک الفاظ میں واضح کیا کہ ایران سفارت کاری اور فوجی تصادم دونوں طرح کی صورتحال کے لیے پوری طرح تیار ہے۔ اسماعیل بقائی نے اعلان کیا کہ کسی بھی حتمی معاہدے طے پانے کی صورت میں تہران دو روز کے اندر اندر آبنائے ہرمز کو مکمل طور پر کھولنے کے لیے تیار ہے۔ انہوں نے شرط عائد کی کہ جب تک امریکا ہمارے پیش کردہ سات نکات کو تسلیم نہیں کرتا، تب تک کوئی معاہدہ طے نہیں پا سکتا، کیونکہ ہم نے اپنے تمام جائز اور منصفانہ مطالبات انتہائی معقول انداز میں متعلقہ فریقین تک پہنچا دیے ہیں اور اب حتمی فیصلہ امریکا کو کرنا ہے۔

ایرانی وزیر خارجہ کا کہنا تھا کہ ہمیں ہر ممکنہ اور کٹھن صورتحال کے لیے ہمہ وقت تیار رہنا ہوگا۔ انہوں نے اس عزم کا اعادہ کیا کہ تہران کسی بھی قیمت پر اپنے افزودہ یورینیم کو کسی دوسرے ملک منتقل کرنے پر رضامند نہیں ہوگا، اور ایران اپنے افزودہ یورینیم کے ذخائر پر ہرگز کوئی سمجھوتہ نہیں کرے گا۔ ان کا مزید کہنا تھا کہ ہمارا جوہری پروگرام ماضی میں بھی مکمل طور پر پُرامن مقاصد کے لیے تھا اور آج بھی پُرامن ہی ہے۔