بانی پی ٹی آئی اور بشریٰ بی بی سے 7 اور 11 ماہ بعد ملاقات ہوئی: بیرسٹر سلمان صفدر

معروف قانون دان اور پی ٹی آئی کے وکیل بیرسٹر سلمان صفدر نے انکشاف کیا ہے کہ آج شام 4 بج کر 30 منٹ پر اڈیالہ جیل انتظامیہ کی جانب سے بانی پی ٹی آئی اور ان کی اہلیہ بشریٰ بی بی سے قانونی ٹیم کی تقریباً 40 منٹ کی طویل ملاقات کا انتظام کیا گیا۔

سماجی رابطے کی ویب سائٹ ’ای ایکس‘ (ٹوئٹر) پر اپنے تفصیلی بیان میں بیرسٹر سلمان صفدر نے بتایا کہ مسلسل اور بار بار درخواستیں دینے کے بعد جا کر بالآخر 7 ماہ کے طویل عرصے کے بعد بانی پی ٹی آئی سے جبکہ پورے 11 ماہ کے طویل وقفے کے بعد بشریٰ بی بی سے ملاقات ممکن ہو سکی ہے۔ تاہم انہوں نے شکوہ کیا کہ ملاقات کا یہ مختصر دورانیہ زیرِ سماعت تمام مقدمات، قانونی چارہ جوئی اور دیگر پیچیدہ قانونی معاملات پر تفصیلی گفتگو کرنے کے لیے ہرگز ناکافی تھا۔

بیرسٹر سلمان صفدر نے مزید بتایا کہ اس ملاقات کے دوران دونوں شخصیات نے اپنی صحت اور جیل کے اندر گزارے جانے والے حالاتِ زندگی سے وکلاء کو تفصیل سے آگاہ کیا، اور ساتھ ہی ملک بھر میں جاری بعض اہم قانونی معاملات اور مقدمات کی پیروی کے حوالے سے قانونی ٹیم کو نئی اور اہم ہدایات بھی جاری کیں۔