اسلام آباد میں ہر طاقتور اور امیر شخص کی تجاوزات کے خلاف کارروائی کی گئی: طلال چودھری

وزیر مملکت برائے داخلہ طلال چودھری نے واضح کیا ہے کہ وفاقی وزیر داخلہ محسن نقوی کی براہِ راست نگرانی میں ملک بھر میں تجاوزات کے خلاف بھرپور کارروائیاں جاری ہیں، اور غیر قانونی قبضوں کے پیچھے چاہے کوئی بھی با اثر اور طاقتور شخصیت کیوں نہ ہو، قانون اپنی جگہ کام کرے گا اور آپریشن بلا تعطل جاری رہے گا۔

ایک بیان میں طلال چودھری نے بتایا کہ انسدادِ تجاوزات مہم کے دوران ایک فائیو اسٹار ہوٹل کی غیر قانونی طور پر تعمیر کی گئی دیوار کو بھی گرا دیا گیا ہے، جبکہ پشاور سمیت دیگر شہروں میں با اثر کاروباری شخصیات کی جانب سے قائم کردہ غیر قانونی تجاوزات اور قبضے بھی مسمار کیے جا رہے ہیں۔ انہوں نے دوٹوک الفاظ میں کہا کہ اسلام کے نام پر ریاست میں غیر قانونی قبضے کسی صورت جاری نہیں رہنے دیے جا سکتے؛ کیا عام عوام کا راستہ روکنا قانونی اور جائز ہے؟ ہمارے دینِ مبین میں تو راستے کھولنے کی سختی سے تلقین کی گئی ہے نہ کہ انہیں زبردستی بند کرنے کی۔

وزیر مملکت کا کہنا تھا کہ کیا کوئی شخص کسی اہم سڑک پر زبردستی قبضہ کر کے اس پر اپنے کسی عزیز کا نام لکھ دے تو وہ عمل جائز ہو جائے گا؟ کیا سیاست اور اقتدار کے زور پر شاہراہوں پر قبضے کرنے کی اجازت دی جا سکتی ہے؟ ریاست نے ایسے عناصر کو بہت کچھ دیا ہے، لیکن اگر وہ بدلے میں ریاست کو کچھ نہیں دے سکتے تو کم از کم غیر قانونی اور غاصبانہ اقدامات سے تو باز آ جائیں۔ طلال چودھری نے تنقید کرتے ہوئے کہا کہ وزیر داخلہ محسن نقوی پر ذاتی نوعیت کے حملے کیے گئے، لیکن مخالفین ان کے اصولی مؤقف کا کوئی جواب نہیں دے سکے، اور ہم اس کا جواب ذاتی حملوں سے نہیں بلکہ قانون کی عملداری سے دیں گے۔

انہوں نے مزید کہا کہ بعض افراد شہدا کی عظیم قربانیوں تک کا مذاق اڑاتے ہیں اور شہدا کے نام پر ملک میں مختص کیے گئے قیمتی پلاٹوں پر قابض ہیں، ریاست کی طرف سے ایسے مافیا کو اب تک بہت زیادہ ڈھیل دی گئی ہے، تاہم اب مزید نرمی نہیں برتی جائے گی۔ اسلام آباد سمیت ہر جگہ ہر امیر اور طاقتور شخص کے خلاف تجاوزات کے نام پر کارروائی کی گئی ہے، اور پشاور کی اہم شاہراہ پر عوام کا راستہ روکنے والی رکاوٹوں کو ہٹانا ناگزیر تھا۔ آخر میں طلال چودھری کا کہنا تھا کہ اگر کسی نے جذبات میں آ کر ہوائی یا تلخ بیانات دیے ہیں تو انہیں اپنی غلطی کا خود احساس ہونا چاہیے، کیونکہ بڑا انسان وہی کہلاتا ہے جو اپنی غلطی کھلے دل سے تسلیم کرے اور اس کا احساس رکھے۔