انتخابی اصلاحات ناگزیر، جب پارلیمنٹ میں ہیں تو کمیٹیوں سے نکلنے کا کیا جواز؟ شوکت یوسفزئی

خیبر پختونخوا کے سیکرٹری اطلاعات شوکت یوسفزئی نے کہا ہے کہ ملک میں شفاف اور جامع انتخابی اصلاحات ناگزیر ہو چکی ہیں، اور جب پارٹی اراکین پارلیمنٹ کا حصہ ہیں تو پارلیمانی کمیٹیوں سے باہر نکلنے کا کوئی جواز نہیں بنتا۔

شوکت یوسفزئی نے تمام پارلیمانی کمیٹیوں میں بھرپور شمولیت کی حمایت کرتے ہوئے کہا کہ پارلیمانی کمیٹیوں کے اندر بیٹھ کر ہی اپنا مؤقف موثر انداز میں پیش کیا جا سکتا ہے، جبکہ کمیٹیوں سے بائیکاٹ کرنے یا باہر نکلنے سے پارٹی کو کوئی سیاسی فائدہ نہیں پہنچے گا۔ انہوں نے اس بات پر زور دیا کہ صوبے اور ملک کے عوام نے پاکستان تحریک انصاف (پی ٹی آئی) کو پارلیمنٹ میں اپنا فعال سیاسی کردار ادا کرنے کے لیے منتخب کر کے بھیجا ہے، اس لیے تحریک انصاف کو چاہیے کہ وہ آنے والی انتخابی اصلاحات کے لیے بھرپور تیاری کرے۔

انہوں نے مزید کہا کہ بدقسمتی سے موجودہ سیاسی رویوں میں پیدا ہونے والی تلخی نے ملکی سیاسی ماحول کو مزید خراب کر دیا ہے۔ شوکت یوسفزئی نے تنقید کرتے ہوئے یہ بھی کہا کہ بیرون ملک بیٹھے کچھ یوٹیوبرز کے منفی اور بے بنیاد بیانیے نے پارٹی کو ناقابلِ تلافی نقصان پہنچایا ہے