بریسٹ کینسر آگاہی مہم، پنجاب اسمبلی کی عمارت گلابی روشنیوں سے منور

لاہور میں بریسٹ کینسر سے آگاہی کے عالمی اور قومی مہینے کی مناسبت سے پنجاب اسمبلی کی عمارت کو خوبصورت گلابی روشنیوں سے منور کر دیا گیا ہے۔

‘پنک ربن پاکستان’ کے اشتراک سے اٹھائے گئے اس اہم اقدام کا بنیادی مقصد بریسٹ کینسر سے متاثرہ خواتین کے ساتھ بھرپور یکجہتی کا اظہار کرنا اور اس موذی مرض کو شکست دینے والی شجاع خواتین کو خراجِ تحسین پیش کرنا ہے۔ ویمن پارلیمنٹری کاکس (WPC) کی قیادت میں کیے جانے والے اس اقدام کے ذریعے ان تمام خواتین کو بھی یاد کیا گیا جو بریسٹ کینسر کے باعث اس دارِ فانی سے کوچ کر گئیں۔

اس موقع پر تقریب اور روشنیوں کے اس اہتمام کے ذریعے اس بات کو اجاگر کیا گیا کہ بریسٹ کینسر کی بروقت تشخیص، ابتدائی اسکریننگ اور معیاری طبی سہولیات تک رسائی کتنی زیادہ اہمیت رکھتی ہے۔ پنجاب اسمبلی کی عمارت پر جگمگاتی گلابی روشنیاں یہ واضح پیغام دے رہی ہیں کہ اس مرض سے متعلق مسلسل آگاہی اور بروقت تشخیص ہزاروں قیمتی جانیں بچا سکتی ہے۔