پشاور کا تاریخی تشخص اجاگر کر کے سیاحوں کی توجہ کا مرکز بنایا جائے: فیصل کریم

گورنر خیبر پختونخوا فیصل کریم کنڈی کی زیر صدارت پشاور کے تاریخی ورثے اور سیاحتی مقامات کی ترقی و بحالی سے متعلق ایک اہم اجلاس منعقد ہوا، جس میں مشیر محکمہ ترقی و منصوبہ بندی عثمان سیف اللہ، سیکرٹری سیاحت سعادت حسن سمیت دیگر متعلقہ اعلیٰ حکام نے شرکت کی۔

اجلاس کے دوران گورنر خیبرپختونخوا کو پشاور کی قدیم تاریخی و ثقافتی اہمیت، تاریخی مقامات اور ورثے کے تحفظ و بحالی سے متعلق تفصیلی بریفنگ دی گئی۔ گورنر کو شہر میں نائٹ ٹورازم، ہیریٹیج ٹورازم اور اس سلسلے میں جاری و مجوزہ ترقیاتی منصوبوں سے بھی آگاہ کیا گیا۔ فیصل کریم کنڈی نے اس موقع پر گفتگو کرتے ہوئے کہا کہ پشاور صدیوں پر محیط تاریخ، تمدن اور ثقافت کا ایک زندہ ورثہ ہے، اور اس شہر کے تاریخی تشخص کو بھرپور طریقے سے اجاگر کر کے اسے ملکی و غیر ملکی سیاحوں کی توجہ کا مرکز بنایا جائے۔

گورنر نے انتظامیہ کو ہدایت کی کہ گورگٹھڑی میں موجود تاریخی ونٹیج ایمبولینس اور فائر بریگیڈ کی گاڑیوں کو ایسی مناسب جگہ پر نمائش کے لیے رکھا جائے جہاں سیاح انہیں با آسانی دیکھ سکیں۔ انہوں نے اس بات پر بھی زور دیا کہ پشاور کے تاریخی مقامات کی سیر کے لیے شہر میں خصوصی سیاحتی بسیں چلانے پر بھرپور توجہ دی جائے، جبکہ موٹروے ٹول پلازہ کے قریب شہر کے اہم تاریخی مقامات اور ثقافتی ورثے سے متعلق بڑے معلوماتی بورڈز بھی نصب کیے جائیں تاکہ باہر سے آنے والے سیاحوں کی رہنمائی ہو سکے۔ انہوں نے مزید کہا کہ پشاور کی روایتی ثقافت، فنون اور ادبی روایات کو زندہ رکھنے کے لیے باقاعدہ ثقافتی سرگرمیوں کا انعقاد وقت کی اہم ضرورت ہے، اور تاریخی ورثے کو محفوظ بنانے کے لیے عملی اقدامات کا آغاز انتہائی خوش آئند ہے۔ اجلاس کے آخر میں گورنر فیصل کریم کنڈی نے لیجنڈری اداکاروں دلیپ کمار اور راج کپور کے آبائی گھروں کی بحالی کا کام جلد از جلد شروع کرنے کی بھی سخت ہدایت کی۔