ہفتہ وار مہنگائی کی شرح میں معمولی کمی، ٹماٹر کی قیمت میں 34.91 فیصد کا بڑا اضافہ

ملک میں ہفتہ وار مہنگائی کی شرح میں 0.35 فیصد کی معمولی کمی ریکارڈ کی گئی ہے، جبکہ گزشتہ ایک ہفتے کے دوران 15 اشیائے ضروریہ کی قیمتوں میں اضافہ اور 12 میں کمی دیکھنے میں آئی ہے۔

ادارہ شماریاتِ پاکستان کی جانب سے ہفتہ وار مہنگائی سے متعلق جاری کردہ تازہ رپورٹ کے مطابق، سالانہ بنیادوں پر ہفتہ وار مہنگائی بڑھنے کی شرح 11.32 فیصد ریکارڈ کی گئی ہے۔ رپورٹ کے مطابق ایک ہفتے کے دوران ٹماٹر کی قیمت میں سب سے زیادہ 34.91 فیصد کا بڑا اضافہ ریکارڈ کیا گیا، اس کے علاوہ آلو 3.27 فیصد، ڈیزل 2.53 فیصد، دال چنا 2.11 فیصد اور سادہ ڈبل روٹی کی قیمت میں 1.29 فیصد اضافہ ہوا۔

دوسری جانب، ادارہ شماریات کا بتانا ہے کہ ایک ہفتے کے دوران بجلی کے سہ ماہی نرخوں میں 3.92 فیصد کمی ریکارڈ کی گئی، جبکہ مرغی 2.95 فیصد، انڈے 2.81 فیصد، آٹا 0.83 فیصد اور ایل پی جی 0.73 فیصد سستی ہوئی۔ اسی طرح پٹرول کی قیمت میں 0.39 فیصد، چینی 0.35 فیصد اور خشک دودھ کی قیمت میں 0.33 فیصد کمی ریکارڈ کی گئی۔

سالانہ بنیادوں پر جاری اعداد و شمار کے مطابق، ایل پی جی کی قیمت میں 106.86 فیصد کا نمایاں اضافہ ہوا، بجلی کے سہ ماہی نرخ 52.38 فیصد، ڈیزل 45.13 فیصد، پٹرول 43.61 فیصد، آٹا 34.87 فیصد اور مرغی 31.72 فیصد مہنگی ہوئی۔ تاہم سالانہ بنیادوں پر آلو 38.67 فیصد، ٹماٹر 27.99 فیصد اور انڈے 26.70 فیصد سستے ہوئے، جبکہ چینی کی قیمت میں 25.21 فیصد کمی ریکارڈ کی گئی۔ اس کے علاوہ سالانہ بنیادوں پر دال مسور 8.37 فیصد اور دال مونگ 6.42 فیصد سستی ہوئی ہیں۔