پشاور سانحے کی انکوائری رپورٹ گورنر کو پیش، سکول مالک ذمہ دار قرار

پشاور کے دیر کالونی سکول حادثے کی انکوائری رپورٹ گورنر خیبر پختونخوا فیصل کریم کنڈی کو باضابطہ طور پر پیش کر دی گئی ہے، جس میں المیے کے ذمہ داران کا واضح تعین کر لیا گیا ہے۔

گورنر خیبر پختونخوا فیصل کریم کنڈی کی زیرِ صدارت ہونے والے اس اہم اجلاس میں مشیر تعلیم عامر عبداللہ، چیف سیکرٹری ڈاکٹر فخر عالم عرفان، سیکرٹری تعلیم عنایت اللہ وسیم اور انکوائری کمیٹی کے معزز ارکان نے شرکت کی۔ اجلاس کے دوران انکوائری کمیٹی نے گورنر کو سانحے کی اصل وجوہات، متعلقہ افسران و عملے کے بیانات، مختلف محکموں کی غفلت اور کمیٹی کے حتمی نتائج و سفارشات پر تفصیلی بریفنگ دی۔

ابتدائی انکوائری رپورٹ میں اس بات کا انکشاف کیا گیا ہے کہ سکول کی عمارت کی تعمیر میں انتہائی ناقص مواد (میٹریل) کا استعمال کیا گیا تھا، جس کی بناء پر سکول کے مالک کو اس حادثے کا براہِ راست ذمہ دار قرار دیا گیا ہے۔ اس کے علاوہ رپورٹ میں متعلقہ سرکاری محکموں کی جانب سے برتی جانے والی سنگین غفلت اور کوتاہیوں سے بھی گورنر کو آگاہ کیا گیا۔ گورنر فیصل کریم کنڈی نے رپورٹ کا جائزہ لینے کے بعد ہدایت کی ہے کہ اس کے تمام قانونی پہلوؤں کا باریک بینی سے جائزہ لینے کے لیے فوری طور پر محکمہ قانون سے باضابطہ مشاورت کی جائے۔ گورنر خیبر پختونخوا نے دوٹوک الفاظ میں حکم دیا ہے کہ دیر کالونی سکول حادثے کے تمام ذمہ داران کے خلاف قانون کے مطابق سخت ترین کارروائی عمل میں لائی جائے۔