انسانی حقوق کی شکایات کیلئے مشترکہ ڈیجیٹل پورٹل قائم کرنے کا فیصلہ

خیبرپختونخوا حکومت نے انسانی حقوق کے تحفظ سے وابستہ مختلف اداروں کے درمیان باہمی رابطہ کاری کو بہتر بنانے اور عوام کی شکایات کا بر وقت و مؤثر ازالہ کرنے کی غرض سے ایک مشترکہ ڈیجیٹل پورٹل قائم کرنے کا تاریخی فیصلہ کر لیا ہے، جس کے ذریعے شکایات کی وصولی، متعلقہ محکموں کو منتقلی اور ان پر ہونے والی پیش رفت کی آن لائن نگرانی کی جاسکے گی۔

صوبائی مشیرِ اطلاعات و تعلقات عامہ ثمر ہارون بلور کے مطابق اس سلسلے میں انسانی حقوق کے اداروں کے درمیان معلومات کے تبادلے اور باہمی تعاون کو فروغ دینے کے لیے ایک اہم مشترکہ اجلاس منعقد ہوا، جس میں شکایات کے حل کے لیے ایک مربوط ڈیجیٹل سسٹم بنانے پر اتفاق کیا گیا۔ ثمر ہارون بلور نے وضاحت کی کہ اس مجوزہ پورٹل کا مقصد شکایات کے ازالے میں ہونے والی غیر ضروری تاخیر اور مختلف اداروں کی جانب سے ایک ہی نوعیت کی کوششوں میں تکرار (اوور لیپنگ) کو کم کرنا ہے۔ اس مقصد کے لیے کسی بھی نئے متوازی ادارے کو قائم کرنے کے بجائے پہلے سے موجود تمام متعلقہ اداروں کو اسی ایک مشترکہ ڈیجیٹل نظام کے ساتھ منسلک کیا جائے گا۔

مشیرِ اطلاعات نے واضح کیا کہ تمام متعلقہ ادارے اپنے اپنے آئینی اور قانونی دائرۂ اختیار میں رہتے ہوئے کام جاری رکھیں گے، جب کہ محکمہ سماجی بہبود، پولیس، صوبائی محتسبین اور دیگر انسانی حقوق کے اداروں کو اس مربوط نظام کا لازمی حصہ بنایا جائے گا۔ انہوں نے متعلقہ حکام کو ہدایت کی کہ شکایات کو درست اداروں تک بروقت پہنچانے کے لیے اقدامات تیز کیے جائیں اور ضلعی سطح پر ادارہ جاتی رابطہ کاری کو مزید مضبوط بنایا جائے۔ تجویز کے تحت ہر ضلع میں ایڈیشنل ڈپٹی کمشنر (اے ڈی سی) انسانی حقوق سے متعلق امور کی نگرانی اور شکایات متعلقہ اداروں کو ریفر کرے گا، جب کہ تمام اضلاع کے ڈسٹرکٹ پولیس افسرز (ڈی پی اوز) کے دفاتر میں خصوصی ‘ہیلپ ڈیسک’ قائم کرنے کی تجویز بھی زیرِ غور ہے۔ ثمر ہارون بلور نے انکشاف کیا کہ یہ اہم فلاحی منصوبہ اقوامِ متحدہ کے ترقیاتی پروگرام (یو این ڈی پی) کے تعاون اور یورپی یونین کے مالی تعاون سے چلنے والے پروگرام ‘حقوقِ پاکستان’ کے تحت آگے بڑھایا جا رہا ہے، جس کی وجہ سے اس پر عمل درآمد سے صوبائی خزانے یا وسائل پر کوئی اضافی مالی بوجھ نہیں پڑے گا۔ اجلاس کے آخر میں مشیرِ اطلاعات نے حکام کو سخت ہدایات جاری کیں کہ ایک ماہ کے اندر اس مشترکہ ڈیجیٹل پورٹل کی تیاری اور عمل درآمد سے متعلق تفصیلی پیش رفت رپورٹ پیش کی جائے۔