پاکستان انڈر 18 بیس بال ٹیم نے امریکی ٹورنامنٹ کا ٹائٹل جیت لیا

پاکستان کی انڈر 18 بیس بال ٹیم نے امریکی ریاست فلوریڈا کے شہر ویسٹ پام بیچ میں منعقدہ ’ورلڈ کمز ٹو دی پام بیچز‘ ٹورنامنٹ کے فائنل میں پیراگوئے کو 11-0 سے باآسانی شکست دے کر ٹائٹل اپنے نام کر لیا ہے۔ پاکستان بیس بال ایسوسی ایشن نارتھ امریکہ کے زیرِ اہتمام منظم کی جانے والی قومی ٹیم نے 21 سے 25 اکتوبر تک جاری رہنے والے اس بین الاقوامی ایونٹ میں شاندار کارکردگی کا مظاہرہ کیا۔ ایسوسی ایشن نے سوشل میڈیا پر ٹیم کی تاریخی کامیابی پر مبارکباد دیتے ہوئے کہا کہ یہ فتح پروگرام کی ترقی اور نوجوان پاکستانی کھلاڑیوں کو عالمی سطح پر بہترین پلیٹ فارم و مواقع فراہم کرنے کے عزم کا روشن ثبوت ہے۔