ایس آئی ایف سی کی معاونت سے پاکستانی ڈیری سیکٹر میں اہم پیشرفت

خصوصی سرمایہ کاری سہولت کونسل (SIFC) کی کاوشوں اور معاونت سے پاکستان کے ڈیری سیکٹر میں ایک نئی اور اہم پیش رفت ہوئی ہے، جس کے تحت فیصل آباد میں جدید ڈیری پروسیسنگ پلانٹ قائم کیا جا رہا ہے۔

اس منصوبے کے لیے 55 ملین ڈالر کی بھاری غیر ملکی و مقامی سرمایہ کاری کا اعلان کیا گیا ہے۔ اس اہم پیش رفت میں پاکستان کی انٹرلوپ ہولڈنگز (Interloop Holdings) اور ترکیہ کی معروف کمپنی ریلا گِدا (Rella Gıda) باہمی اشتراک سے کام کریں گی۔

اس جدید ترین پلانٹ میں اعلیٰ معیار کا پنیر (Cheese)، مکھن (Butter) اور وہے پروٹین (Whey Protein) تیار کی جائے گی، جس سے ملکی سطح پر ڈیری مصنوعات میں ویلیو ایڈیشن کو زبردست فروغ ملے گا۔ اس پلانٹ کے مکمل طور پر فعال ہونے کے بعد کمپنی کی سالانہ دودھ پروسیسنگ کرنے کی صلاحیت 180 ملین لیٹر تک پہنچ جائے گی۔ ماہرین کے مطابق اس اقدام سے جہاں ملک کی ویلیو ایڈڈ برآمدات میں خاطر خواہ اضافہ ہوگا، وہیں مقامی ڈیری انڈسٹری کو بھی ایک نئی جہت ملے گی۔