پاکستان میں کوئی کمی نہیں، سکول کرکٹ سے نیا ٹیلنٹ سامنے آئے گا: محسن نقوی

چیئرمین پاکستان کرکٹ بورڈ (پی سی بی) محسن نقوی نے کہا ہے کہ پاکستان میں کرکٹ کے ٹیلنٹ کی کوئی کمی نہیں ہے، بلکہ اتنا ٹیلنٹ موجود ہے کہ اسے سنبھالنا مشکل ہو جاتا ہے۔ یونیورسٹی آف سینٹرل پنجاب (یو سی پی) لاہور میں ایک تقریب سے خطاب کرتے ہوئے محسن نقوی نے بتایا کہ ملک میں نیا ٹیلنٹ سامنے لانے کے لیے پہلی مرتبہ سکول کرکٹ کا باقاعدہ آغاز کیا گیا ہے، جس میں صرف لاہور سے 1400 سکولوں کی ٹیمیں شامل ہیں جبکہ اگلے سال یہ تعداد 3 ہزار سے تجاوز کر جائے گی۔ انہوں نے اعلان کیا کہ پی سی بی سکول کرکٹ کی فاتح ٹیم کو 2 کروڑ اور رنر اپ کو 1 کروڑ روپے انعامی رقم دے گا، جبکہ اگلے سال سے ویمن کرکٹ چیمپئن شپ کرانے کا بھی منصوبہ ہے۔ ان کا مزید کہنا تھا کہ عاقب جاوید اور ان کی ٹیم کی محنت سے قومی ٹیم کے لیے نئے اور بہترین کھلاڑیوں کی تیاری کا عمل تیزی سے جاری ہے۔