نیب کے سہیل آفریدی کے معاون خصوصی ڈاکٹر امجد سمیت 5 افراد کو طلبی کے نوٹس جاری

قومی احتساب بیورو (نیب) خیبر پختونخوا نے خیبر پختونخوا کے وزیراعلیٰ سہیل آفریدی کے معاونِ خصوصی برائے ہاؤسنگ اور رکنِ صوبائی اسمبلی ڈاکٹر امجد علی سمیت دیگر افراد کے خلاف نیب آرڈیننس 1999 کی دفعہ 19 کے تحت 5 مختلف طلبی نوٹسز جاری کر دیے ہیں۔

نیب کے مطابق یہ اقدام آمدن سے زائد اثاثوں، اختیارات کے ناجائز استعمال اور بدعنوانی کے الزامات کی جاری انکوائری کے سلسلے میں اٹھایا گیا ہے۔ نیب نے کیس سے متعلق چار اہم گواہوں—باچا سید، محمد عارف شاہ، سراج احمد اور نوید احمد—کو 20 سے 22 اکتوبر 2026 کے دوران شواہد، متعلقہ ریکارڈ اور اپنے بیانات قلمبند کرانے کے لیے طلب کیا ہے۔

اس کے علاوہ نیب نے اسلام آباد کی ایٹین ہاؤسنگ سوسائٹی اور جلوزئی ہاؤسنگ اسکیم سے متعلق پلاٹوں کی الاٹمنٹ، ملکیت اور ادائیگیوں کا مکمل تفصیلی ریکارڈ طلب کر لیا ہے۔ نیب خیبر پختونخوا نے محکمہ حسابات کے دفتر کو ہدایت کی ہے کہ وہ ڈاکٹر امجد علی کی تنخواہوں، الاؤنسز، مراعات اور سفری اخراجات کا تمام ریکارڈ فوراً فراہم کرے۔ نیب حکام نے تنبیہ کی ہے کہ مطلوبہ معلومات اور ریکارڈ فراہم نہ کرنے پر متعلقہ افراد کے خلاف قانونی کارروائی اور قانونی مقدمہ چلایا جائے گا۔