خیبرپختونخوا میں گورنر راج کسی لالچ میں نہیں لگایا گیا: شرجیل میمن

سندھ کے سینئر وزیر شرجیل انعام میمن نے کہا ہے کہ خیبر پختونخوا میں گورنر راج کسی سیاسی لالچ یا مفاد کی بنیاد پر نہیں لگایا گیا، بلکہ صوبائی حکومت امن و امان اور دہشت گردی سے متعلق حالات کو ٹھیک کرنے کے لیے تیار ہی نہیں تھی۔

کراچی میں میڈیا سے گفتگو کرتے ہوئے شرجیل میمن نے کہا کہ پاکستان تحریکِ انصاف نے دہشت گرد عناصر کے لیے نرم رویہ اور ‘سافٹ کارنر’ اختیار کر کے خود اپنی حکومت گنوائی ہے۔ انہوں نے الزام عائد کیا کہ پی ٹی آئی کے سابق وزیرِ اعلیٰ جلسوں میں دہشت گردوں کی حمایت کرتے رہے اور بانی پی ٹی آئی دہشت گردوں کو دفاتر کھول کر دینے کی باتیں اور فنڈنگ کرتے رہے۔ سینئر وزیر کا کہنا تھا کہ دہشت گردی کا ہونا ایک الگ مسئلہ ہے لیکن دہشت گردوں کی کھلم کھلا حمایت اور ان کا ساتھ دینا بالکل مختلف اور خطرناک بات ہے۔

شرجیل میمن نے بلوچستان کی مثال دیتے ہوئے کہا کہ وہاں دہشت گردی کا چیلنج موجود ہے لیکن صوبائی حکومت سیکیورٹی فورسز کے ساتھ مل کر اس کے خلاف لڑ رہی ہے۔ اس موقع پر انہوں نے جمیعت علمائے اسلام (ف) کے سربراہ کے حالیہ بیان پر افسوس کا اظہار کرتے ہوئے کہا کہ مولانا فضل الرحمان کو دہشت گردی کے خاتمے کے لیے حکومت اور اداروں کے ہاتھ مضبوط کرنے چاہئیں۔