معمولی تنازع پر ٹھیکیدار نے گاڑی تلے کچل کر 15 سالہ محنت کش کی جان لے لی

نجی ہاؤسنگ سوسائٹی میں ایک معمولی تنازع پر ٹھیکیدار نے مبینہ طور پر تیز رفتار گاڑی تلے کچل کر 15 سالہ محنت کش کو قتل کر دیا۔

تفصیلات کے مطابق نجی ہاؤسنگ سوسائٹی میں گھر جانے سے روکنے پر ٹھیکیدار اور 15 سالہ لڑکے کے درمیان تلخ کلامی ہوئی، جس کے دوران مبینہ طور پر لڑکے کے بھاگنے پر ٹھیکیدار نے اس پر گاڑی چڑھا دی۔ ریسکیو ذرائع کے مطابق گاڑی کی ٹکر سے 15 سالہ وسیم عباس موقع پر ہی دم توڑ گیا۔ اس دردناک واقعے کی ایک ویڈیو بھی منظرِ عام پر آ گئی ہے، جس میں گاڑی کی شدید ٹکر کا منظر واضح دیکھا جا سکتا ہے۔

پولیس حکام کا کہنا ہے کہ پولیس نے فوری کارروائی کرتے ہوئے مقدمے میں نامزد مرکزی ملزم توقیر کو گرفتار کر لیا ہے۔ پولیس کے مطابق جاں بحق ہونے والا وسیم عباس مظفر گڑھ کا رہائشی تھا اور ہاؤسنگ سوسائٹی میں الیکٹریشن کا کام کرتا تھا۔ تفتیشی حکام نے بتایا ہے کہ گرفتار ملزم سے واقعے کے محرکات سے متعلق مزید تفتیش جاری ہے۔