حوثیوں کے حکومتی فورسز کے تربیتی کیمپ پر تین میزائل حملے، 53 افراد جاں بحق

یمن کے جنوبی صوبے شبوا میں حوثی جنگجوؤں کی جانب سے کیے گئے 3 بیلسٹک میزائل حملوں کے نتیجے میں 53 سے زائد افراد جاں بحق اور 200 سے زیادہ شدید زخمی ہو گئے ہیں۔ حملے میں بین الاقوامی سطح پر تسلیم شدہ یمنی حکومت کی حمایتی فورسز کے ایک بڑے تربیتی کیمپ کو نشانہ بنایا گیا۔

فرانسیسی خبر رساں ادارے (AFP) کے مطابق، یہ الم ناک واقعہ شبوا میں واقع ‘العلم’ فوجی کیمپ میں پیش آیا، جہاں پولیس اور سیکیورٹی اہلکاروں کی بڑی تعداد تربیت اور تعیناتی کے لیے موجود تھی۔ یمنی فوج کے ترجمان ماجد النزیلی نے تصدیق کی کہ حوثیوں نے کیمپ پر یکے بعد دیگرے 3 بیلسٹک میزائل داغے۔ حملے کے بعد شدید زخمیوں کی بڑی تعداد کے باعث مقامی ہسپتالوں میں ایمرجنسی نافذ کر دی گئی ہے جبکہ کئی تشویشناک مریضوں کو دوسرے صوبوں کے طبی مراکزمیں منتقل کرنا پڑا۔

یمنی فوجی ذرائع نے خدشہ ظاہر کیا ہے کہ یہ بڑی میزائل کارروائی شبوا کے علاقے میں حوثیوں کی ممکنہ زمینی پیش قدمی یا حملے کا پیش خیمہ ہو سکتی ہے۔ حملے سے قبل حوثیوں نے شبوا کو اپنے زیرِ کنٹرول صوبے ‘البیضا’ سے ملانے والی اہم شاہراہ کو بھی بلاک کر دیا تھا۔ واضح رہے کہ سال 2022 میں ہونے والی عارضی جنگ بندی کے خاتمے کے بعد سے یمن میں حکومت اور حوثی الملیشیا کے درمیان جھڑپوں میں دوبارہ شدید تیزی آ گئی ہے، جس نے بحیرہ احمر اور باب المندب کی تزویراتی شاہراہوں کے قریب علاقائی سلامتی کو خطرے میں ڈال دیا ہے۔