اسحاق ڈار کی تجارت، سرمایہ کاری بڑھانے کیلئے قابل عمل تجاویز تیار کرنے کی ہدایت

نائب وزیراعظم و وزیرِ خارجہ اسحاق ڈار کی زیرِ صدارت اعلیٰ سطحی اجلاس منعقد ہوا جس میں دوست اور شراکت دار ممالک کے ساتھ تجارت اور سرمایہ کاری کے فروغ کے لیے اٹھائے جانے والے مختلف اقدامات کا تفصیلی جائزہ لیا گیا۔

ترجمان دفترِ خارجہ کے مطابق اجلاس میں عالمی منڈیوں تک پاکستانی مصنوعات کی رسائی کو بہتر بنانے، ملکی برآمدات میں تنوع لانے اور غیر ملکی سرمایہ کاری کے بہاؤ کو آسان و محفوظ بنانے کی حکمتِ عملی پر سیر حاصل تبادلہ خیال کیا گیا۔ اس کے علاوہ سرحد پار اور علاقائی تجارت کی راہ میں حائل طریقہ کار کی پیچیدگیوں اور انتظامی رکاوٹوں کو دور کرنے کے طریقوں پر بھی غور کیا گیا۔

اجلاس کی صدارت کرتے ہوئے نائب وزیراعظم اسحاق ڈار نے ملکی معاشی استحکام اور اقتصادی تعاون کو آگے بڑھانے کے لیے تمام متعلقہ وزارتوں اور اداروں کے درمیان قریبی اور مضبوط رابطہ کاری کی ضرورت پر زور دیا۔ انہوں نے حکام کو ہدایت کی کہ تجارتی مواقع کو ٹھوس معاشی نتائج میں تبدیل کرنے کے لیے فوری طور پر قابلِ عمل تجاویز تیار کی جائیں اور ان پر بروقت عملدرآمد کو یقینی بنایا جائے