رحمان بابا ایکسپریس کی 14 بوگیاں پٹری سے اتر گئیں، 4 مسافر جاں بحق

کراچی سے پشاور جانے والی رحمان بابا ایکسپریس کو ملتان کے علاقے شیر شاہ پل کے قریب ہولناک حادثہ پیش آیا ہے، جہاں ٹرین کی 14 بوگیاں پٹڑی سے اتر جانے کے نتیجے میں 4 مسافر جاں بحق اور 30 سے زائد شدید زخمی ہو گئے۔ حادثے کے فوراً بعد ریلوے حکام، پولیس اور ریسکیو 1122 کی ٹیموں نے موقع پر پہنچ کر بوگیوں میں پھنسے مسافروں کو نکالنے کے لیے امدادی کارروائیاں شروع کر دیں اور تمام زخمیوں کو فوری طور پر نشتر ہسپتال ملتان منتقل کیا گیا۔ حادثے کے باعث اپ ٹریک پر ٹرینوں کی آمدورفت معطل ہو گئی ہے جبکہ درجنوں مسافر کھلے آسمان تلے سامان سمیت پٹڑی کے کنارے موجود ہیں۔ وزیراعظم محمد شہباز شریف نے واقعے کا فوری نوٹس لیتے ہوئے حادثے پر گہرے دکھ کا اظہار کیا اور متعلقہ حکام کو ریسکیو آپریشن تیز کرنے اور زخمیوں کو بہترین طبی سہولیات کی فراہمی یقینی بنانے کی ہدایت کی ہے۔