امریکا سے بڑی طاقتوں کی ایران کو فتح کرنیکی کوششیں بھی کوڑے دان میں جا پہنچیں: محسن رضائی

ایرانی سپریم نیشنل سکیورٹی کونسل کے سیکرٹری میجر جنرل محسن رضائی نے امریکا کو شدید خبردار کرتے ہوئے کہا ہے کہ تاریخ میں بڑی سے بڑی طاقتوں نے بھی ایران کو تسخیر کرنے کی کوشش کی لیکن وہ ناکام ہو کر تاریخ کے کوڑے دان کی نذر ہو گئیں۔ اپنے ایک سخت ردعمل والے بیان میں محسن رضائی نے کہا کہ ایران کے ساتھ ہر قسم کی محاذ آرائی میں امریکا کو بار بار ذلت آمیز شکست کا سامنا کرنا پڑا ہے، جس کے بعد اب امریکا نے مایوسی کے عالم میں ایران کے خلاف معاشی جنگ کا سہارا لے لیا ہے۔

میجر جنرل محسن رضائی نے واضح کیا کہ اس محاذ آرائی کا خاتمہ کب اور کیسے ہوگا، اس کا فیصلہ واشنگٹن نہیں بلکہ تہران کرے گا اور ایران اپنے تمام جائز مطالبات کی منظوری تک مزاحمت کا راستہ برقرار رکھے گا۔ انہوں نے واشنگٹن کو شدید نتائج کی دھمکی دیتے ہوئے کہا کہ اگر امریکا نے ایران کے خلاف دوبارہ کسی قسم کی فوجی یا پراکسی جارحیت کی کوشش کی تو علاقے میں موجود تمام امریکی اثاثے براہ راست حملوں کی زد میں آسکتے ہیں۔ ان کا کہنا تھا کہ ان کے اہداف میں امریکا کے انتہائی اہم ڈیٹا سسٹمز اور مصنوعی ذہانت (AI) کے جدید سینسرز بھی شامل ہو سکتے ہیں۔

انہوں نے مزید کہا کہ ایران اب ماضی کے روایت پسندانہ سفارتی طریقہ کار پر واپس نہیں آئے گا، تاہم تہران نے سفارت کاری کے راستے کو مکمل طور پر ترک بھی نہیں کیا ہے۔