یو اے ای سپریم کورٹ نے غیر ملکی رہائشی کی ملک بدری کا حکم منسوخ کر دی

متحدہ عرب امارات (یو اے ای) کی وفاقی سپریم کورٹ نے منشیات کے استعمال سے متعلق ایک مقدمے میں غیر ملکی رہائشی کی ملک بدری کا حکم منسوخ کرتے ہوئے ابتدائی عدالت کی جانب سے عائد کیا گیا 30 ہزار درہم کا مالی جرمانہ بحال رکھ کر اہم فیصلہ سنا دیا ہے۔ بین الاقوامی خبر رساں ادارے ‘گلف نیوز’ کی رپورٹ کے مطابق یہ کیس ریاست عجمان کا تھا، جہاں ابتدائی عدالت نے متعلقہ شخص کو جرم ثابت ہونے پر مالی جرمانہ عائد کیا تھا، تاہم بعد میں اپیل کورٹ نے فیصلہ بدلتے ہوئے جرمانے کے بجائے ملزم کی ملک بدری کا سخت حکم جاری کر دیا تھا۔

رپورٹ کے مطابق متاثرہ شخص متحدہ عرب امارات میں ہی پیدا ہوا تھا اور اپنے خاندان کے ساتھ وہیں مقیم ہے۔ اس نے اپیل کورٹ کے فیصلے کو اعلیٰ ترین عدالت یعنی وفاقی سپریم کورٹ میں چیلنج کیا۔ دفاعی وکیل عبداللہ بن حاتم نے سپریم کورٹ کے سامنے مؤقف اختیار کیا کہ چونکہ اپیل صرف ملزم کی جانب سے دائر کی گئی تھی، اس لیے اپیل کورٹ کے پاس یہ قانوناً اختیار نہیں تھا کہ وہ سزا میں شدت پیدا کر کے ملزم کی قانونی پوزیشن کو مزید خراب کرے۔

وفاقی سپریم کورٹ نے اپنے فیصلے میں واضح کیا کہ اماراتی قانون کے تحت بعض حالات میں قید کی سزا کی جگہ ملک بدری کا حکم تو دیا جا سکتا ہے، لیکن مالی جرمانے کو ملک بدری سے تبدیل نہیں کیا جا سکتا۔ سپریم کورٹ نے اپیل کورٹ کے اس اقدام کو غیر قانونی قرار دیتے ہوئے ملزم کی اپیل جزوی طور پر منظور کر لی اور ملک بدری کا فیصلہ کالعدم قرار دے کر 30 ہزار درہم کا اصل جرمانہ بحال کر دیا۔ عدالت نے واضح کیا کہ اس فیصلے کا مطلب ملزم کو بری کرنا نہیں بلکہ صرف قانون کے مطابق سزا کو درست کرنا ہے۔ قانون دانوں کے مطابق یہ فیصلہ اپیلوں کے دائرہ کار اور اختیارات کی حدود کے لیے ایک اہم مثال بن گیا ہے، تاہم یہ ملک بدری سے متعلق تمام مقدمات کے لیے عمومی استثنا نہیں ہے۔