بارش، آندھی اور طوفان کا خدشہ، پنجاب میں کا الرٹ جاری کردیا

پنجاب کے مختلف اضلاع میں مغربی ہواؤں کے نئے سلسلے کے داخلے کے بعد پروونشل ڈیزاسٹر مینجمنٹ اتھارٹی (پی ڈی ایم اے) نے شدید بارشوں، تیز ہواؤں، گرج چمک اور مری و گلیات سمیت بالائی پہاڑی علاقوں میں لینڈ سلائیڈنگ کا خدشہ ظاہر کرتے ہوئے صوبائی سطح پر الرٹ جاری کر دیا ہے۔ پی ڈی ایم اے پنجاب کے مطابق یہ موسمی سلسلہ 11 سے 14 اکتوبر تک صوبے کے زیادہ تر علاقوں کو متاثر رکھے گا۔ 11، 13 اور 14 اکتوبر کو لاہور، راولپنڈی، اٹک، چکوال، جہلم، گوجرانوالہ، سیالکوٹ، شیخوپورہ، اور میانوالی سمیت دیگر اضلاع میں جبکہ 11 اور 13 اکتوبر کو فیصل آباد، سرگودھا، اور جھنگ میں بھی وقفے وقفے سے بارشوں اور تیز ہواؤں کا امکان ظاہر کیا گیا ہے۔

دوسری جانب صوبائی دارالحکومت لاہور میں رات گئے شروع ہونے والی ہلکی بارش سے موسم خوشگوار ہو گیا ہے اور گرمی کی شدت میں واضح کمی آئی ہے۔ بارش کے فوراً بعد واسا (WASA) کا عملہ نچلے علاقوں سے پانی کی نکاسی کے لیے فیلڈ میں متحرک ہو چکا ہے جس کی نگرانی مرکزی کنٹرول روم سے کی جا رہی ہے۔ ڈی جی پی ڈی ایم اے عرفان علی کاکڑ اور انتظام نے تمام ڈویژنل کمشنرز، ڈپٹی کمشنرز، محکمہ صحت، آبپاشی اور لوکل گورنمنٹ کو ہائی الرٹ رہنے کا حکم دیا ہے۔ اتھارٹی نے شہریوں کو خراب موسم کے دوران غیر ضروری سفر سے گریز کرنے، بجلی کے کھمبوں اور بوسیدہ عمارتوں سے دور رہنے کی تاکید کی ہے، جبکہ کسی بھی ایمرجنسی کی صورت میں ہیلپ لائن 1129 پر رابطہ کرنے کی ہدایت کی ہے۔