کرنٹ سے ہاتھ کھونے والی بچی کے تمام علاج کا خرچ پیسکو کو اٹھانے کا حکم

اسلام آباد ہائیکورٹ نے 11 ہزار وولٹ کے کرنٹ سے دونوں ہاتھ گنوانے والی 9 سالہ بچی لبابہ کے علاج، جدید مصنوعی اعضا اور بحالی کے اخراجات کی ادائیگی سے متعلق صدرِ پاکستان کا فیصلہ برقرار رکھتے ہوئے پشاور الیکٹرک سپلائی کمپنی (پیسکو) کی درخواست مسترد کر دی ہے۔ جسٹس اعظم خان نے 11 صفحات پر مشتمل تحریری فیصلہ جاری کرتے ہوئے پیسکو کو ہدایت کی کہ بچی کا آرمڈ فورسز انسٹی ٹیوٹ آف ری ہیبلیٹیشن میڈیسن راولپنڈی سے جامع طبی معائنہ کرایا جائے اور تمام اندرون و بیرونِ ملک علاج کے اخراجات برداشت کیے جائیں۔ عدالت نے اپنے فیصلے میں واضح کیا کہ بجلی تقسیم کار کمپنیوں کا کام صرف بجلی دینا نہیں بلکہ انسانی جانوں کا تحفظ اور حفاظتی تدابیر اپنانا بھی ہے۔ واضح رہے کہ جولائی 2021 میں چارسدہ کے علاقے پیر قلعہ میں بجلی تار گرنے سے بچی کے دونوں ہاتھ کاٹنے پڑے تھے، جس پر صدرِ پاکستان نے پیسکو کو تمام اخراجات اٹھانے کا حکم دیا تھا۔