خاران کے مغوی ڈپٹی کمشنر منیر احمد سومرو بازیاب

بلوچستان کے ضلع خاران کے اغوا ہونے والے ڈپٹی کمشنر منیر احمد سومرو بحفاظت بازیاب ہو گئے ہیں، جس کی تصدیق پولیس اور ان کے خاندانی ذرائع نے کر دی ہے۔ پولیس کے مطابق ڈپٹی کمشنر منیر احمد سومرو کو رواں برس 20 ستمبر کو اس وقت اغوا کیا گیا تھا جب وہ کوئٹہ سے خاران کی طرف سفر کر رہے تھے۔

ڈپٹی کمشنر کے ساتھ گاڑی میں موجود دیگر افراد، جن میں ان کا ڈرائیور اور ذاتی محافظ شامل تھے، کو بھی اغوا کاروں نے تحویل میں لیا تھا۔ تاہم پولیس ذرائع نے بتایا ہے کہ ڈرائیور اور گن مین کو واقعے کے تین روز بعد ہی چھوڑ دیا گیا تھا، جبکہ ڈپٹی کمشنر کی بازیابی کے لیے سیکیورٹی اداروں کی جانب سے کوششیں جاری تھیں۔ اب ان کی بحفاظت واپسی پر اہل خانہ اور مقامی انتظامیہ نے اطمینان کا اظہار کیا ہے۔