رواں مالی سال کے پہلے تین ماہ میں تجارتی خسارہ 10.79 ارب ڈالر تک پہنچ گیا

ادارہ شماریات پاکستان (PBS) کی جاری کردہ تازہ ترین رپورٹ کے مطابق، رواں مالی سال کے پہلے تین ماہ (جولائی تا ستمبر) کے دوران ملک کا تجارتی خسارہ 15 فیصد کے نمایاں اضافے کے ساتھ 10 ارب 79 کروڑ ڈالر (10.79 ارب ڈالر) تک پہنچ گیا ہے۔ رپورٹ کے مطابق ستمبر 2026 میں پاکستان کا ماہانہ تجارتی خسارہ 3 ارب 56 کروڑ ڈالر ریکارڈ کیا گیا، جس میں ماہانہ بنیادوں پر 8 فیصد جبکہ سالانہ بنیادوں پر 6 فیصد کا اضافہ دیکھنے میں آیا۔

اعداد و شمار کے مطابق ستمبر کے مہینے میں ملکی درآمدات 12 فیصد ماہانہ اور 11 فیصد سالانہ اضافے کے ساتھ 6 ارب 50 کروڑ ڈالر رہیں، جبکہ برآمدات میں بھی بہتری دیکھی گئی جو 16 فیصد ماہانہ اور 18 فیصد سالانہ اضافے کے بعد 2 ارب 94 کروڑ ڈالر تک پہنچ گئیں۔ مالی سال کی پہلی سہ ماہی کے مجموعی جائزہ کے مطابق، ملک کا کل درآمدی بل 13 فیصد کے اضافے کے ساتھ 19 ارب 21 کروڑ ڈالر رہا، جبکہ مجموعی برآمدات 11 فیصد اضافے سے 8 ارب 42 کروڑ ڈالر ریکارڈ کی گئیں۔