ایران میں مہنگائی کی شرح 83 سال کی بلند ترین سطح پر پہنچ گئی

ایران میں معاشی بحران شدید تر ہو گیا ہے جہاں مہنگائی کی شرح 83 سال کی بلند ترین سطح پر پہنچ گئی ہے۔ معاشی اعداد و شمار جاری کرنے والے ایران کے سرکاری ادارے کی رپورٹ کے مطابق ستمبر میں افراطِ زر (مہنگائی) کی شرح ریکارڈ 73.6 فیصد تک جا پہنچی ہے، جو کہ 1943ء کے بعد سے اب تک کی بلند ترین اور خوفناک ترین سطح ہے۔

رپورٹ میں انکشاف کیا گیا ہے کہ رواں سال ستمبر کے دوران عام عوام کے زیرِ استعمال بنیادی اشیائے ضروریہ اور خدمات کی قیمتیں گزشتہ سال کے اسی مہینے کے مقابلے میں اوسطاً 89.8 فیصد تک زیادہ رہیں۔ سرکاری اعداد و شمار سے معلوم ہوتا ہے کہ ستمبر کے مہینے میں مواصلات، گاڑیوں، جوتوں اور ملبوسات کی قیمتوں میں سب سے زیادہ اور غیر معمولی اضافہ ریکارڈ کیا گیا ہے، جس نے ایرانی شہریوں کی قوتِ خرید کو شدید متاثر کیا ہے۔