صنعتکار سیاستدانوں پر سیاست چھوڑیں اور صنعتی ترقی پر توجہ دیں: مراد علی شاہ

وزیراعلیٰ سندھ سید مراد علی شاہ نے کورنگی ایسوسی ایشن آف ٹریڈ اینڈ انڈسٹری (کاٹی) کے نو منتخب عہدیداروں سے خطاب کرتے ہوئے کہا ہے کہ کراچی میں امن و امان کے قیام اور بہتری کے لیے انڈسٹریل زون کے صنعتکاروں کے مشوروں پر عمل درآمد کیا گیا ہے۔ انہوں نے اعتراف کیا کہ کچے کے علاقے میں امن و امان کی خراب صورتحال حکومت کے لیے ایک بڑا چیلنج اور پریشانی کا باعث بنی رہی، تاہم بالآخر سندھ حکومت نے تمام تر اقدامات کر کے علاقے میں امن بحال کر دیا ہے۔

وزیراعلیٰ سندھ نے صنعتکاروں کو یقین دہانی کرائی کہ کاٹی کے صنعتی علاقے کے لیے پانی کی قلت کا مسئلہ جلد حل کر دیا جائے گا۔ انہوں نے کہا کہ سندھ حکومت نے کاٹی کے انفراسٹرکچر اور سڑکوں کی تعمیر و مرمت کے لیے 2 ارب روپے کے فنڈز جاری کیے تھے۔ مراد علی شاہ نے واضح کیا کہ سندھ حکومت پر اکثر کام کی سست روی کا الزام عائد کیا جاتا ہے، تاہم کاٹی کو 6 ماہ قبل 2 ارب روپے ملنے کے باوجود اب تک سڑکوں کی تعمیر کا کام شروع نہیں ہو سکا۔ اس موقع پر وزیراعلیٰ نے صنعتکاروں کو سیاست سے دور رہنے کا مشورہ دیتے ہوئے کہا کہ تاجر اور صنعتکار سیاستدانوں پر سیاست چھوڑ دیں اور اپنی تمام تر توجہ صنعتی ترقی اور معاشی استحکام پر مرکوز رکھیں۔