مراکش کے بادشاہ نے فاطمہ زہرا کو ملک کی پہلی خاتون وزیر اعظم مقرر کردیا

مراکش میں ایک نئی تاریخ رقم ہو گئی ہے جہاں شاہ محمد ششم نے ‘آتھینٹیسٹی اینڈ ماڈرنٹی پارٹی’ (PAM) کی مرکزی رہنما فاطمہ زہرا المنصوری کو ملک کی پہلی خاتون وزیر اعظم مقرر کر دیا ہے۔ غیر ملکی میڈیا کے مطابق، ان کی پارٹی نے حال ہی میں منعقد ہونے والے پارلیمانی انتخابات میں شاندار کامیابی حاصل کی ہے۔ 395 رکنی ایوان میں ان کی جماعت نے 97 نشستیں حاصل کیں، جو دوسرے نمبر پر آنے والی پارلیمانی جماعت سے 31 نشستیں زیادہ ہیں۔ تاہم، آئینی طور پر سادہ اکثریت نہ ہونے کے باعث انہیں حکومت سازی کے لیے دیگر سیاسی جماعتوں سے اتحاد قائم کرنا ہوگا۔

شاہی اعلان کے مطابق، 50 سالہ فاطمہ زہرا المنصوری اس سے قبل وزیرِ ہاؤسنگ اور مراکش شہر کی میئر کی حیثیت سے خدمات انجام دے چکی ہیں۔ وہ 2009ء میں بھی پہلی بار مراکش کی میئر منتخب ہوئی تھیں اور اس عہدے پر فائز ہونے والی پہلی خاتون کا اعزاز حاصل کیا تھا۔ وہ مراکش کی پہلی اور پوری عرب دنیا کی دوسری خاتون وزیر اعظم کا سنگِ میل عبور کر چکی ہیں۔ واضح رہے کہ مراکش میں نیم آئینی بادشاہت کا نظام قائم ہے، جہاں بنیادی اقتدار شاہ محمد ششم کے پاس ہے، تاہم 2011ء کی آئینی اصلاحات کے بعد منتخب پارلیمنٹ کو بھی قانون سازی کے اہم اختیارات حاصل ہیں۔