نیویارک: اقوامِ متحدہ کے باہر کشمیری امریکی کمیونٹی کا احتجاج، بھارتی وزیرِ خارجہ کی تقریر پر شدید ردِعمل

نیویارک میں کشمیری امریکی کمیونٹی کے زیرِ اہتمام اقوامِ متحدہ کے ہیڈکوارٹر (یو این پلازہ) کے باہر ایک عظیم الشان اور پرامن احتجاجی مظاہرہ کیا گیا۔ ‘ورلڈ کشمیر اویئرنس فورم’ اور نیویارک و واشنگٹن میٹروپولیٹن ایریاز کی کشمیری و پاکستانی برادری نے مظاہرے میں بڑی تعداد میں شرکت کر کے اقوامِ متحدہ کی جنرل اسمبلی سے بھارتی وزیرِ خارجہ کے خطاب پر شدید احتجاج ریکارڈ کرایا۔ مظاہرین نے “ایک پکار” کے عنوان سے پلے کارڈز اور بینرز اٹھا رکھے تھے جن پر کشمیریوں کے حقِ خودارادیت، انسانی حقوق کی بحالی اور آزادی کے حق میں نعرے درج تھے۔

مظاہرے کے دوران جاری کردہ مشترکہ بیان میں عالمی ادارے کے پوڈیم سے بھارتی مندوب کو تقریر کی اجازت دینے پر شدید مایوسی کا اظہار کیا گیا۔ کشمیری رہنماؤں کا کہنا تھا کہ جس ملک کا انسانی حقوق کا ریکارڈ داغدار ہو، اس کے نمائندے کو عالمی فورم مہیا کرنا مظلوموں کے زخموں پر نمک چھڑکنے کے مترادف ہے۔ مقررین نے اقوامِ متحدہ سے پرزور مطالبہ کیا کہ مقبوضہ وادی میں جاری مظالم کا فوری نوٹس لیا جائے اور یو این کی منظور شدہ قراردادوں کے مطابق کشمیریوں کو ان کا بنیادی حقِ خودارادیت دلایا جائے۔ مظاہرے کے اختتام پر اقوامِ متحدہ کے حکام کو اس ضمن میں ایک تفصیلی یادداشت بھی پیش کی گئی۔