ڈی آئی خان میں پولیس چیک پوسٹ پر مبینہ خودکش دھماکا، 11 افراد شہید، متعدد زخمی

خیبر پختونخوا کے ضلع ڈیرہ اسماعیل خان (ڈی آئی خان) کے علاقے درازندہ میں واقع ایک مشترکہ چیک پوسٹ پر دہشت گردوں نے خودکش کار بم حملہ کیا ہے، جس کے نتیجے میں 6 پولیس اہلکاروں اور 2 کسٹمز اہلکاروں سمیت 11 افراد شہید اور متعدد زخمی ہو گئے۔

ریسکیو 1122 اور پولیس ذرائع کے مطابق بارود سے بھری ہوئی گاڑی چیک پوسٹ سے ٹکرائی گئی جس کے باعث انتہائی شدید نوعیت کا دھماکا ہوا۔ اس بزدلانہ دہشت گردانہ حملے میں شہید ہونے والوں میں 6 پولیس اہلکار، 2 کسٹمز اہلکار، دو خواتین اور ایک معصوم دو سالہ بچہ بھی شامل ہے۔ دھماکے کے نتیجے میں پولیس اور کسٹمز کے عملے سمیت کئی افراد شدید زخمی ہوئے ہیں، جنہیں فوری طور پر ابتدائی طبی امداد دینے کے بعد قریبی ہسپتالوں میں منتقل کر دیا گیا ہے۔

ہسپتال ذرائع کے مطابق کئی زخمیوں کی حالت انتہائی تشویشناک ہے، جس کے باعث اموات میں مزید اضافے کا خدشہ ظاہر کیا جا رہا ہے۔ واقعے کی اطلاع ملتے ہی سکیورٹی فورسز اور قانون نافذ کرنے والے اداروں کی بھاری نفری فوری طور پر جائے وقوعہ پر پہنچ گئی، اور پورے علاقے کو گھیرے میں لے کر سرچ اور کلیئرنس آپریشن کا آغاز کر دیا گیا ہے۔

ابتدائی اطلاعات کے مطابق اس حملے میں انسدادِ اسمگلنگ چیک پوسٹ کو خاص طور پر نشانہ بنایا گیا تھا۔ تاہم، اس خونی حملے کی ذمہ داری تاحال کسی تنظیم کی طرف سے قبول نہیں کی گئی ہے، اور سکیورٹی ادارے واقعے کی تمام زاویوں سے گہرائی سے تحقیقات کر رہے ہیں۔