ہم پر جنگ مسلط کی تو وہی حشر کریں گے جو پچھلے سال کیا تھا: خواجہ آصف

وزیرِ دفاع خواجہ آصف نے دشمن ملک کو سخت پیغام دیتے ہوئے کہا ہے کہ اگر پاکستان پر دوبارہ کوئی جنگ مسلط کی گئی تو اس کا وہی حشر کیا جائے گا جو پچھلے سال کیا تھا۔ اقوامِ متحدہ کی جنرل اسمبلی سے وزیراعظم کے خطاب کے بعد نیویارک میں پاکستانی میڈیا سے گفتگو کرتے ہوئے خواجہ آصف نے کہا کہ وزیراعظم نے عالمی برادری کے سامنے پاکستان کا موقف جامع انداز میں پیش کیا ہے اور ہماری ہمیشہ سے پہلی ترجیح خطے میں امن قائم رکھنا ہی رہی ہے۔

انڈیا اور افغانستان کے حوالے سے بات کرتے ہوئے وزیرِ دفاع نے کہا کہ بھارت ہمارا ازلی دشمن ہے اور اس کے منافقانہ رویے سے کسی خیر کی توقع نہیں رکھی جا سکتی۔ انہوں نے مزید کہا کہ ماضی کی حکومتوں نے افغان پالیسی کے حوالے سے جو کانٹے بوئے تھے، موجودہ حکومت اب انہیں صاف کر رہی ہے۔ اس موقع پر قومی ایئرلائن کی بحالی کی خوشخبری دیتے ہوئے خواجہ آصف نے انکشاف کیا کہ ان شاء اللہ اگلے چھ ماہ کے اندر پی آئی اے (PIA) کی امریکہ کے لیے براہِ راست پروازیں بحال ہو جائیں گی۔