غزہ کی پٹی میں اسرائیل کے فضائی حملے، 4 فلسطینی شہید

غزہ کی پٹی پر اسرائیلی فوج کی جانب سے کی جانے والی تازہ ترین فضائی کارروائیوں اور ڈرون حملوں کے نتیجے میں مزید 4 فلسطینی شہید جبکہ متعدد شدید زخمی ہو گئے ہیں۔ فلسطینی طبی حکام کے مطابق پہلا نشانہ جنوبی غزہ میں خان یونس کے مغربی علاقے کو بنایا گیا، جہاں ایک شہری گاڑی پر اسرائیلی جیٹ طیارے نے بمباری کی۔ اس حملے میں اسامہ ابو خاطر اور محمد ابو علوان موقع پر شہید ہو گئے جبکہ گاڑی میں سوار دو دیگر افراد شدید زخمی ہوئے۔

علاوہ ازیں، غزہ سٹی اور وسطی غزہ کے علاقے دیر البلاح میں کی جانے والی دو الگ الگ فضائی کارروائیوں میں مزید دو فلسطینی جاں بحق ہوئے۔ اسرائیلی فوج نے اپنے جاری کردہ بیان میں محمد ابو علوان کو حماس کا سینئر مالیاتی عہدیدار قرار دیتے ہوئے دعویٰ کیا ہے کہ تل ابیب حماس کو اپنے فوجی یا مالیاتی نظام کی بحالی کی ہرگز اجازت نہیں دے گا اور غزہ سے حماس کے مکمل خاتمے تک ایسے سیکیورٹی آپریشنز جاری رہیں گے۔ دوسری جانب، حماس کے حکام نے اسرائیلی دعوے اور اس حملے پر فوری طور پر اپنا باضابطہ تبصرہ جاری نہیں کیا ہے۔