بانی پی ٹی آئی سے ملاقات کا مطالبہ، اجازت کے بغیر گرفتاری پر رہائی ہونی چاہیے: علامہ ناصر عباس

مجلس وحدت مسلمین (MWM) کے سربراہ اور سینیٹ میں اپوزیشن لیڈر علامہ ناصر عباس نے پارلیمنٹ ہاؤس میں صحافیوں سے گفتگو کرتے ہوئے حکومت سے مطالبہ کیا ہے کہ بانی پاکستان تحریک انصاف (PTI) سے ان کی ملاقات فوری طور پر کروائی جائے۔ انہوں نے ان خبروں کی تردید کی کہ حکومت کی جانب سے بانی پی ٹی آئی سے ملاقات کے حوالے سے کوئی پیغام موصول ہوا ہے، اور واضح کیا کہ اگر ایسا کوئی پیغام دیا بھی گیا ہے تو وہ ان تک نہیں پہنچایا گیا اور نہ ہی محمود خان اچکزئی سے اس سلسلے میں کوئی رابطہ کیا گیا ہے۔

علامہ ناصر عباس کا کہنا تھا کہ ملک کو موجودہ سیاسی و معاشی بحران سے نکالنے کا واحد راستہ بانی پی ٹی آئی سے براہِ راست مذاکرات اور ملاقات میں مضمر ہے۔ پنجاب میں تحریک انصاف کے رہنماؤں اور کارکنان کی گرفتاریوں پر تشویش کا اظہار کرتے ہوئے اپوزیشن لیڈر نے کہا کہ اگر سپیکر سے اجازت لے کر اراکین کو گرفتار کیا گیا ہے تو یہ پارلیمان کے تقدس پر حملہ ہے، اور اگر بغیر اجازت گرفتاری کی گئی ہے تو انہیں فوری طور پر رہا کیا جانا چاہیے۔