اسلام آباد سمیت مختلف شہروں میں زلزلے کے جھٹکے، شدت 4.9 ریکارڈ

اسلام آباد اور پشاور سمیت ملک کے مختلف بالائی و شمالی شہروں میں زلزلے کے شدید جھٹکے محسوس کیے گئے ہیں، جس کے باعث لوگوں میں خوف و ہراس پھیل گیا اور وہ کلمہ طیبہ کا ورد کرتے ہوئے عمارتوں سے باہر نکل آئے۔ زلزلہ پیما مرکز (PMD) کے مطابق نیشنل زلزلہ مانیٹرنگ سینٹر نے ریکٹر اسکیل پر اس زلزلے کی شدت 4.9 ریکارڈ کی ہے۔

زلزلہ پیما مرکز کی رپورٹ کے مطابق زیرِ زمین زلزلے کی گہرائی 196 کلومیٹر ریکارڈ کی گئی، جبکہ اس کا مرکز افغانستان کا ہندوکش ریجن تھا۔ زلزلے کے جھٹکے اسلام آباد، راولپنڈی، پشاور، مردان اور خیبر پختونخوا کے مختلف اضلاع میں محسوس کیے گئے۔ ابتدائی اطلاعات کے مطابق زلزلے کے نتیجے میں فی الحال کسی جانی یا مالی نقصان کی اطلاع موصول نہیں ہوئی ہے۔