پاکستان اور آئی اے ای اے میں چشمہ-5 نیوکلیئر پاور پلانٹ کے سیف گارڈز معاہدے پر دستخط

پاکستان اور عالمی جوہری توانائی ایجنسی (IAEA) کے درمیان 1200 میگاواٹ کے چشمہ-5 (C-5) نیوکلیئر پاور پلانٹ کے سیف گارڈز معاہدے پر باضابطہ دستخط ہو گئے ہیں۔ معاہدے پر چیئرمین پاکستان اٹامک انرجی کمیشن (PAEC) ڈاکٹر راجہ علی رضا انور اور آئی اے ای اے کے ڈائریکٹر جنرل رافیل ماریانو گروسی نے دستخط کیے۔ اس اہم تقریبِ دستخط میں چائنا اٹامک انرجی اتھارٹی (CAEA) کے چیئرمین شان ژونگ ڈے نے بھی خصوصی شرکت کی۔

واضح رہے کہ آئی اے ای اے کے بورڈ آف گورنرز نے مارچ 2026ء میں سی-5 سیف گارڈز معاہدے کی متفقہ منظوری دی تھی۔ ترجمان کے مطابق یہ معاہدہ پاکستان کے پرامن ایٹمی عزم، سول نیوکلیئر ٹیکنالوجی کے شفاف استعمال اور بین الاقوامی سطح پر عدم پھیلاؤ (Non-Proliferation) کی ذمہ داریوں پر عالمی برادری کے بے پناہ اعتماد کا واضح مظہر ہے۔

اعلامیے کے مطابق چشمہ-5 نیوکلیئر پاور پلانٹ پر تعمیراتی کام انتہائی تیزی سے جاری ہے اور ری ایکٹر بلڈنگ کے گنبد کی تنصیب وقت سے پہلے ہی مکمل کر لی گئی ہے۔ 1200 میگاواٹ کا یہ جدید پاور پلانٹ سال 2028ء میں بجلی کی باضابطہ پیداوار شروع کرے گا، جس سے قومی گرڈ کو سستی، ماحول دوست اور پائیدار بجلی کی فراہمی ممکن ہو سکے گی۔ اس وقت پاکستان 3530 میگاواٹ کی مجموعی صلاحیت کے 6 ایٹمی پاور پلانٹس کامیابی سے چلا رہا ہے، جبکہ معاہدے کے موقع پر چیئرمین پی اے ای سی اور چیئرمین سی اے ای اے کی ملاقات میں پاک چین پرامن ایٹمی تعاون کے مستقبل کے منصوبوں پر بھی تفصیلی تبادلہ خیال کیا گیا۔