ایران کا امریکا سے خطے میں امن کیلئے عدم استحکام پر مبنی مداخلت بند کرنے کا مطالبہ

ایران نے یمن کی تحریکِ انصار اللہ (حوثی تحریک) کے بارے میں امریکی وزیرِ خارجہ کے حالیہ الزامات کو سراسر بے بنیاد قرار دیتے ہوئے سختی سے مسترد کر دیا ہے۔ ایرانی وزارتِ خارجہ کے ترجمان اسماعیل بقائی نے ردِعمل دیتے ہوئے واضح کیا کہ انصار اللہ یمن کی ایک بالکل خودمختار اور مستقل مزاج تنظیم ہے، جو تمام سیاسی و عسکری فیصلے اپنے خطے کی ضرورت اور حکمتِ عملی کے تحت خود کرتی ہے۔ انہوں نے زور دے کر کہا کہ انصار اللہ نہ تو کسی بیرونی ملک سے احکامات لیتی ہے اور نہ ہی وہ خطے میں کسی کی ’پراکسی‘ کے طور پر کام کر رہی ہے۔

ترجمان ایرانی وزارتِ خارجہ اسماعیل بقائی نے مزید کہا کہ مشرقِ وسطیٰ میں مسلسل بدامنی اور عدم استحکام کی اصل جڑ امریکہ کی بلاجواز فوجی مداخلت، جارحانہ رویہ اور حاکمانہ پالیسیاں ہیں۔ اگر واشنگٹن انتظامیہ واقعی خطے میں پائیدار امن کی خواہاں ہے تو اسے فوری طور پر مداخلت کا سلسلہ بند کرنا ہو گا۔ انہوں نے متنبہ کیا کہ یمن پر بمباری اور بیرونی فوجی دباؤ کے ذریعے کبھی امن قائم نہیں کیا جا سکتا، بلکہ امن کا واحد راستہ تمام مقامی و علاقائی فریقوں کے متفقہ روڈ میپ کی بنیاد پر باہم اور حقیقی مذاکرات میں ہی مضمر ہے