قطر کی سعودی عرب کے جنوبی علاقوں پر حوثی حملوں کی شدید مذمت

قطر کی حکومت نے سعودی عرب کے جنوبی اور سرحدی علاقوں پر يمن کے حوثی باغیوں کی جانب سے کیے جانے والے حالیہ ڈرون اور میزائل حملوں کی شدید الفاظ میں مذمت کی ہے۔ قطری وزارتِ خارجہ کی جانب سے جاری کردہ باضابطہ بیان کے مطابق، قطر کے وزیراعظم و وزیرِ خارجہ شیخ محمد بن عبدالرحمان آل ثانی نے سعودی عرب کے وزیرِ خارجہ شہزادہ فیصل بن فرحان سے ٹیلی فون پر رابطہ کیا، جس کے دوران انہوں نے سعودی عرب کی سلامتی، خودمختاری اور دفاعی اقدامات کے لیے قطر کی مکمل اور غیر مشروط حمایت و یکجہتی کا اعادہ کیا۔

ٹیلی فونک گفتگو کے دوران دونوں رہنماؤں نے خطے میں روز بروز بڑھتی ہوئی عسکری کشیدگی پر شدید تشویش کا اظہار کیا اور علاقائی سلامتی کو درپیش چیلنجز سے نمٹنے پر تبادلہ خیال کیا۔ اس کے علاوہ دونوں وزرائے خارجہ نے مشرقِ وسطیٰ میں مجموعی امن و امان کے قیام، کشیدگی کو کم کرنے اور تنازعات کو سفارتی ذرائع سے حل کرنے کے لیے جاری بین الاقوامی و علاقائی کوششوں پر بھی تفصیلی بات چیت کی۔