حسینہ واجد کی بیٹی صائمہ واجد ڈبلیو ایچ او کے عہدے سے مستعفی

بنگلہ دیش کی سابق وزیراعظم شیخ حسینہ واجد کی بیٹی صائمہ واجد عالمی ادارہ صحت (WHO) کے جنوب مشرقی ایشیا کے لیے ریجنل ڈائریکٹر کے عہدے سے باضابطہ طور پر مستعفی ہو گئی ہیں۔ بین الاقوامی خبر رساں ادارے ’رائٹرز‘ کے مطابق صائمہ واجد کے خلاف مالیاتی فراڈ اور ضابطہ اخلاق کی خلاف ورزی کی تحقیقات زیرِ التوا تھیں، جس کے باعث انہیں گزشتہ سال سے ہی جبری رخصت پر بھیج دیا گیا تھا۔ یاد رہے کہ صائمہ واجد نے جنوری 2024ء میں 5 برس کی مدت کے لیے یہ بااثر سفارتی و انتظامی عہدہ سنبھالا تھا، تاہم الزامات کے باعث وہ اپنی مدتِ ملازمت پوری نہ کر سکیں۔

ان کے خلاف بنگلہ دیش کے انسدادِ بدعنوانی کمیشن (ACC) نے دھوکہ دہی، جعل سازی اور سرکاری پلاٹ کے غیر قانونی حصول کے الزامات کے تحت سنگین مقدمات درج کر رکھے ہیں، جبکہ عالمی ادارہ صحت نے خود ان پر چین کے سرکاری دورے سے متعلق مالی بے ضابطگیوں اور اپنی تعلیمی اسناد کے حوالے سے غلط بیانی کرنے کے الزام کے تحت کارروائی شروع کی تھی۔ ڈبلیو ایچ او انتظامیہ کے ذرائع کے مطابق ادارہ آئندہ سال جنوری تک جنوب مشرقی ایشیا ریجن کے لیے نئے ریجنل ڈائریکٹر کے باضابطہ انتخاب کا عمل مکمل کرنے کی منصوبہ بندی کر رہا ہے۔